पोखरा, ११ जेठ
पोखराका प्रतिष्ठित संगीतकार श्रीमान थुलुङको निधन भएको ४५ औं दिनको पुण्य तिथिमा शनिबार पोखरा वृद्धाश्रममा थुलुङ परिवारले फलफूल वितरण गरेको छ । संगीतकार थुलुङको स्कुटर दुर्घटनामा परी गत चैत्र २७ गते निधन भएको थियो ।
पोखरा–१७, सीतापाइलास्थित सो वृद्धाश्रममा रहेका ७० जना वृद्धवृद्धाहरूलाई स्व. थुलुङकी धर्मपत्नी विमला राई र उहाँका पाँच जना छोरीहरूले फलफूल वितरण गरेका हुन् । त्यसैगरी, सोही अवसरमा स्व. थुलुङलाई फेवा टेलिभिजनले मरणोपरान्त सम्मान समेत गरेको छ । नेपाली संगीतको विकास र फेवा टेलिभिजनको प्रवद्र्धनमा विशेष योगदान दिएको भन्दै मरणोपरान्त सम्मान सो टेलिभिजनले मरणोपरान्त सम्मान गरेको हो । फेवा टेलिभिजनका वरिष्ठ समाचार सम्पादक रूद्रबहादुर श्रीसले स्व. थुलुङकी धर्मपत्नी विमला राईलाई सो सम्मानपत्र प्रदान गर्नुभयो ।

फलफूल वितरण तथा सम्मान कार्यक्रममा स्व. थुलुङको जीवनबारे प्रकाश पार्दै पूर्वाञ्चल सेवा समाज, कास्कीका अध्यक्ष डीबी राईले देशले एक कुशल संगीतकार र संगीत प्रशिक्षक गुमाएको बताउनुभयो । थुलुङको असामयिक र अकल्पनीय निधनले सिंगो नेपाली संगीतलाई क्षति पुगेको भन्दै अध्यक्ष राईले स्व. थुलुङको भौतिक शरीर नरहेपनि उहाँका कीर्तिहरू सधैं अमर रहिरहने उल्लेख गर्नुभयो ।
फेवा टेलिभिजनका वरिष्ठ समाचार सम्पादक रूद्रबहादुर श्रीसले टेलिभिजनबाट प्रसारण हुने लोकप्रिय कार्यक्रम “फेवा चौतारी”का वरिष्ठ सदस्य थुलुङको निधनले ठूलो अभाव महसुस गरेको बताउनुभयो । थुलुङले टेलिभिजनका लागि मात्र नभइ सिंगो नेपाली संगीतका लागि पु¥याएको योगदान अतुलनीय रहेको भन्दै श्रीसले थुलुङका अधुरा सपना पूरा गर्न सबैले आ–आफ्नो ठाउँबाट लाग्नुपर्नेमा जोड दिनुभयो ।
पोखरा वृद्धाश्रमका संरक्षक वसन्तकेशव पराजुलीले स्व. थुलुङ एक प्रतिभाशाली कलाकार भएको बताउँदै उहाँलाई गुमाउनुपर्दा पीडाबोध भएको उल्लेख गर्नुभयो । थुलुङको ४५ औं दिनको पुण्य तिथिमा वृद्धाश्रमका वृद्धवृद्धाहरूलाई फलफूल वितरण गरी पुण्य कार्य गरेकोमा परिवारजनलाई धन्यवाद दिँदै पराजुलीले जन्मनु र मर्नु प्राकृतिक नियम भएपनि अकालमा मृत्यु हुँदा भने असह्य पीडा हुने बताउनुभयो ।
सोलुखुम्बुमा जन्मिएका स्व. थुलुङले विगत अढाइ दशकदेखि पोखरामा तराना म्यूजिक सेन्टर नामक संगीत पाठशाला खोलेर सयौं संगीत प्रशिक्षार्थीलाई संगीत प्रशिक्षण दिइसक्नुभएको छ । थुलुङको निधनपछि तराना म्यूजिकको व्यवस्थापनको जिम्मेवारी सम्हालेका गायक उमेश राईले स्व. थुलुङका सपना पूरा गर्न आफूले पोखराको स्थापित संगीत पाठशालालाई नेतृत्व दिएर निरन्तरता दिने अठोट लिएको बताउनुभयो ।