पोखरा, २४ फागुन
गण्डकी प्रदेश प्रमुख अमिक शेरचनले १११ औं अन्तर्राष्ट्रिय श्रमिक महिला दिवस (८ मार्च)को अवसरमा सम्पूर्ण देश तथा विदेशमा रहनुभएका महिला दिदीबहिनीहरूलाई शुभकामना दिनुभएको छ ।
सोमबार एक शुभकामना सन्देश जारी गर्दै महिलाले काम गर्न पाउने अधिकार, समान ज्याला, मताधिकार, सार्वजनिक पद धारण गर्न पाउने अधिकार र सबैखालका उत्पीडनको अन्त्यको मागसहित विभिन्न देशमा भएका श्रमिक महिलाहरूले संघर्ष गरेको प्रदेश प्रमुख शेरचनले उल्लेख गर्नुभएको छ । त्यस्तै, प्रदेश प्रमुख शेरचनले सो संघर्षको परिणामस्वरुप विभिन्न देशमा उपरोक्त अधिकार प्राप्त भएपश्चात अन्तर्राष्ट्रिय श्रमिक महिला दिवस (८ मार्च)लाई विशेष रुपमा मनाउन थालिएको समेत बताउनुभएको छ ।
साथै प्रदेश प्रमुख शेरचनले नेपालको संविधान २०७२ ले महिला अधिकारको संवैधानिक रुपमै विशेष व्यवस्था गरेको र संवैधानिक व्यवस्थालाई व्यवहारिक रुपमा कार्यान्वयन गर्दै महिलाका थप अधिकार प्राप्त गर्न यस दिवसले प्रेरणा मिलोस् भन्ने शुभकामना समेत दिनुभएको छ ।