रूद्र श्रीसमगर
पोखरा, २० जेठ
तनहुँको व्यास नगरपालिका–१२, घाँसीकुवामा तीन दिने मगर भाषा, लिपि, साहित्य तथा संस्कृतिसम्बन्धी तालिम आइतबारदेखि सुरु भएको छ ।
नेपाल आदिवासी जनजाति महासंघ वडा समन्वय परिषद्, व्यास नगरपालिका–१२, घाँसीकुवाको आयोजना तथा वडा नं. १२ कार्यालयको सहयोगमा सुरु भएको तालिममा वडा अन्तर्गतका मगर समुदायका प्रशिक्षार्थीहरूको सहभागिता छ ।
तालिमको एक कार्यक्रमका बीच वडाध्यक्ष तोत्रबहादुर कुँवरले उद्घाटन गर्नुभयो । कार्यक्रममा वडा महिला सदस्य मीना राना पन्तले पनि बोल्नुभएको थियो । मंगलबारसम्म चल्ने तालिममा नेपाल मगर लेखक संघका केन्द्रीय सदस्य रूद्रबहादुर श्रीसमगरले प्रशिक्षण दिनुहुनेछ ।
महासंघ वडा समन्वय परिषद्का अध्यक्ष नवीन थापामगरको अध्यक्षतामा भएको कार्यक्रमको सञ्चालन सचिव रीता थापामगर र नेपाल मगर संघ, व्यास नगरपालिका–१२, घाँसीकुवाकी अध्यक्ष दानमाया थापामगरले स्वागत गर्नुभएको थियो ।