काठमाडौं, १५ असोज
दुवै मृगौला खराब भइ हाल डाइलासिस गराइरहेका धादिङको नीलकण्ठ नगरपालिका–१२, आँपश्वारानिवासी ३५ वर्षीय तेजबहादुर गिदेलमगरले आर्थिक अभावका कारण उपचारमा समस्या भएको भन्दै सहयोगको याचना गर्नुभएको छ ।
वैदेशिक रोजगारीका शिलशिलामा संयुक्त अरब इमिरेट्स (युएई)को दुबई शहरमा कार्यरत छँदा नै दुवै मृगौला खराब भएपछि गिदेलमगर स्वदेश फर्कनुभएको हो । अहिले काठमाडौंको वनस्थलीस्थित किड्नी सेन्टरमा हप्तामा दुई पटक डाइलासिस गराउँदै आउनुभएका गिदेलमगरले आर्थिक अभावका कारण थप उपचारमा समस्या भएको भन्दै सहयोगको याचना गर्नुभएको हो ।
विगत चार वर्षदेखि उहाँकी ३५ वर्षीया श्रीमती टोपकुमारी गिदेलमगर समेत रक्त क्यान्सरबाट पीडित भइ भरतपुर क्यान्सर अस्पतालमा उपचार गराउँदै आउनुभएको छ । मृगौलापीडित गिदेलमगरलाई सहयोग गर्न चाहने इच्छुकले सानिमा बैंकको धादिङबेंशी शाखामा रहेको बैंक खाता नं. ००४०००१०९८५१२ मा सहयोग रकम जम्मा गर्न सक्नुहुनेछ । साथै, मोबाइल नम्बर ९८६०४०७५४५ मा समेत सम्पर्क गर्न सकिनेछ ।