पोखरा, ३० पुस
ब्रेन ट्युमर भइ मणिपाल शिक्षण अस्पताल, पोखराको स्नायु सघन उपचार कक्षमा उपचाररत नेपाल मगर संघ, कास्कीका जिल्ला सदस्य नारायण काउछामगरको ४५ वर्षको अल्पायुमै निधन भएको छ ।
गुल्मी जिल्ला घर भइ हाल ः कास्कीको पोखरा महानगरपालिका, लेखनाथ, बुढीबजारनिवासी काउछामगर केही समय अगाडि सडक दुर्घटनामा परी गम्भीर घाइते हुनुभएको थियो । सडक दुर्घटनामा परी गम्भीर घाइते भइ लामो समय उपचाररत रहनुभएका काउछामगर अहिले फेरि बायाँ मस्तिष्कमा मासु पलाएपछि मणिपाल शिक्षण अस्पतालको स्नायु सघन उपचार कक्ष (न्यूरो आईसीयू)मा उपचाररत हुनुहुन्थ्यो ।
परिवारको आर्थिक अवस्था अत्यन्त नाजुक रहेकाले थप उपचारमा समस्या भएको थियो । ब्रेन ट्युमरसँगै मधुमेह तथा उच्च रक्तचापबाट समेत पीडित मगर अगुवा स्व. काउछा कास्कीमा क्रियाशील एक युवा सामाजिक अभियन्ता हुनुहुन्थ्यो । नेपाल मगर संघ, कास्कीका सचिव यामबहादुर थापामगरले काउछामगरलाई बचाउने प्रयास गर्दागर्दै पनि बचाउन नसकिएको प्रतिक्रिया दिनुभयो । काउछाको निधनले कास्कीको सामाजिक आन्दोलनमा अपूरणीय क्षति पुगेको सचिव थापामगरले बताउनुभयो ।