फोक्सिङकोट (पाल्पा), २७ कात्तिक
दुर्गम क्षेत्रको शिक्षा तथा स्वास्थ्यका क्षेत्रमा सामाजिक रुपमा क्रियाशील संस्था मिलन फाउण्डेशन नेपालले पाल्पाको रम्भा गाउँपालिका–२, फोक्सिङकोट, सुरुमडाँडास्थित महेन्द्र आधारभूत विद्यालयमा न्यानो कपडा वितरण गरेको छ ।
सोमबार आयोजित कार्यक्रममा फाउण्डेशनका संरक्षक समाजसेवी दुर्गा गुरुङ “मिलन”, कार्यवाहक अध्यक्ष देवी गुरुङलगायतले सो विद्यालयमा अध्यापनरत शिक्षक, शिक्षिका तथा विद्यार्थीहरूलाई न्यानो कपडा वितरण गर्नुभयो । जस अन्तर्गत स्वीटर, टोपी, ट्राउजरलगायतका न्यानो कपडा वितरण गरिएको थियो । सो अवसरमा विद्यालयका अपाङ्गता भएका पूर्व विद्यार्थी अमरसिंह घर्तीमगरलाई पनि न्यानो कपडा वितरण गरियो ।
कार्यक्रममा बोल्दै प्रमुख अतिथि समेत रहनुभएका फाउण्डेशनका संरक्षक समाजसेवी दुर्गा गुरुङ “मिलन”ले आफूले कसैसँग सहयोग नमागीकन आफ्नै पसिनाले कमाएको पैसाबाट सामाजिक कार्य गर्दै आएको बताउनुभयो । विद्यालयलाई गरिएको सहयोगलाई सदुपयोग गर्न आग्रह गर्दै विद्यालयको शैक्षिक गुणस्तर अभिवृद्धिका लागि अभिभावकले पनि विशेष चासो दिनुपर्ने बताउनुभयो ।
फाउण्डेशनकी कार्यवाहक अध्यक्ष देवी गुरुङले नेपालका दुर्गम क्षेत्रमा निःस्वार्थ भावले संस्थाले विभिन्न सहयोग गर्दै आएको बताउँदै सहयोगको सही सदुपयोग गर्नुपर्नेमा जोड दिनुभयो । विद्यालय व्यवस्थापन समितिका अध्यक्ष प्रेमबहादुर सिंजालीले समाजसेवी गुरुङले विद्यालयलाई गरेको सहयोग अतुलनीय रहेको भन्दै आगामी दिनमा पनि सहयोगले निरन्तरता पाउने आशा राखेको बताउनुभयो ।
सो अवसरमा विद्यालयमा समाजसेवी गुरुङद्वारा स्थापित मिलन पुस्तकालयकी सदस्य मीना सिंजाली, प्रधानाध्यापक नारायण मसराङ्गीलगायतले समाजसेवी गुरुङको सहयोगले विद्यालयको विकासका लागि धेरै महत्वपूर्ण टेवा मिलेको बताउनुभयो । मिलन पुस्तकालयका अध्यक्ष दुर्गाबहादुर थापाको अध्यक्षतामा भएको कार्यक्रमको सञ्चालन सहायक प्रधानाध्यापक रनबहादुर कामु र पूर्व प्रधानाध्यापिका कलिसरा रानाले स्वागत गर्नुभएको थियो ।
फाउण्डेशनका संरक्षक दुर्गा गुरुङ “मिलन” र अध्यक्ष गंगा गुरुङले न्यानो कपडा वितरणका लागि सहयोगको प्रायोजन गर्नुभएको हो । फाउण्डेशनले यसअघि पनि सो विद्यालयमा युरोगार्ड, एक थान कम्प्युटर, पुस्तकालयका लागि पुस्तकहरू प्रदान गर्नुका साथै, विद्यालय परिसरभित्र ३ सय वटा दालचिनीका बिरुवा वृक्षारोपण समेत गरेको छ ।
