“कौरा” डकुमेण्ट्री फिल्मको पोष्ट प्रोडक्सन सकियो, छिटै प्रदर्शनमा आउने

पोखरा, २६ असोज
राष्ट्रिय मौलिक कौरा संरक्षण समिति, नेपालको निर्माणमा मगरात क्षेत्रमा प्रचलित मौलिक संस्कृतिको रुपमा मानिएको “कौरा” नाचको डकुमेण्ट्री फिल्मको पोष्ट प्रोडक्सन सकिएको छ । पोष्ट प्रोडक्सन सकिएसँगै छिटै प्रदर्शनमा आउने समितिका अध्यक्ष हर्क आलेमगरले जानकारी दिनुभयो ।
ऐतिहासिक मगरात क्षेत्रका खासगरी, तनहुँ, नवलपरासी, पाल्पा, स्याङ्जालगायतका जिल्लामा नाचिने मौलिक कौरा नाचको संरक्षण र नयाँ पुस्तालाई संस्कृति हस्तान्तरणको उद्देश्यसहित “कौरा” डकुमेण्ट्री फिल्म निर्माण गरिएको अध्यक्ष आलेमगरले जानकारी दिनुभयो । विशेषतः मगर समुदायमा प्रचलित “कौरा” नाचको ऐतिहासिक पक्षलाई उजागर गर्ने प्रयाससँगै फिल्म शैलीमा डकुमेण्ट्री निर्माण गरिएको छ भने केही कथानक बनाउने प्रयास पनि गरिएको छ ।
“कौरा” नाचको उत्पत्तिस्थल मानिएको तनहुँ जिल्लामा यस डकुमेण्ट्री फिल्मको छायाङ्कन गरिएको छ । “कौरा” डकुमेण्ट्री फिल्ममा कलाकारहरू रविन्द्र थापामगर, सबिता रानामगर “नाना”, पदम थापामगर, पवन रानामगर, सरुना मगरलगायतले अभिनय गरेका छन् । यस डकुमेण्ट्री फिल्मको पहिलो प्रदर्शन तनहुँमै गर्ने तयारीमा रहेको अध्यक्ष आलेमगरको भनाइ छ ।

Advertisment