दुबई, २१ साउन
गुरुङ संस्कृतिमा आधारित नेपाली भाषाको चलचित्र ‘क्यु प्ह्रो छे’ अर्थात् ‘भेडी गोठाले’ आगामी अगष्ट २४ तारिखमा संयुक्त अरब इमिरेट्स (युएई)को दुबई शहरमा देखाइने भएको छ ।
मिलन डी.जी. इन्टरनेशनल प्रालिको पहिलो प्रस्तुती रहेको सो चलचित्र तमु प्ये ल्हु संघ युएईको आयोजनामा विशेष प्रदर्शन गर्न लागिएको हो । तमु प्ये ल्हु संघ लमजुङ शाखाले निर्माण गर्न लागेको क्होइबो धिंको सहयोगार्थ सो विशेष प्रदर्शन गर्न लागिएको संघकी मीरा प्हच्यु तमुले जानकारी दिनुभयो ।
इस्लाम धर्मावलम्बीको महŒवपूर्ण चाड बकर इद (इद ऊल अदा)को अवसर पारेर संघले दुबईमा चलचित्र प्रदर्शन गर्न लागेको उहाँले बताउनुभयो । सो अवसरमा चलचित्र ‘भेडी गोठाले’का कार्यकारी निर्माता एवं मिलन डी.जी. इन्टरनेशनल प्रालिका अध्यक्ष, समाजसेवी दुर्गा गुरुङ ‘मिलन’को विशेष उपस्थिति रहने जनाइएको छ । कार्यकारी निर्माता गुरुङ हङकङबाट युएई जानुहुनेछ ।
शुक्रबार बरदुबई सिल्भर स्पोन रेष्टुरेण्टमा हुने सो विशेष प्रदर्शन दुई चरणमा दिउँसो २ बजे र ४ बजे हुने विष्णु ङोप्चै तमुले जानकारी दिनुभयो । लमजुङको क्होइबो धिं निर्माण सहयोगार्थ यस चलचित्रको प्रदर्शन विभिन्न ठाउँमा भइसकेका छन् । हालसम्म हङकङ, कतार, नेपालमा लमजुङ, पोखरा, स्याङ्जा, काठमाडौंलगायतका ठाउँमा यस चलचित्रको विशेष प्रदर्शन सफलतापूर्वक सम्पन्न भइसकेको छ ।