लखीसराय। हिन्दी पखवाडाको अवसरमा भारतको लखीसराय पुगेका देश–विदेशका पत्रकारहरूको टोलीले जिल्लाका ऐतिहासिक, धार्मिक तथा पुरातात्त्विक स्थलहरूको अवलोकन गरेको छ। जिल्ला प्रशासनले पत्रकार टोलीलाई स्वागत तथा सम्मानसमेत गरेको छ।

अन्तर्राष्ट्रिय पत्रकार संघका अध्यक्ष राजु लामासहित बंगलादेशका पत्रकार मोहम्मद अब्दुल रहमान, मानवअधिकार पत्रकारितामा अन्तर्राष्ट्रिय रूपमा चर्चित वरिष्ठ पत्रकार डा. शशि भूषण कुमारलगायत पत्रकारहरूको टोलीलाई लखीसरायका जिल्ला पदाधिकारी शैलेन्द्र कुमारले कार्यालयमै पुष्पगुच्छा प्रदान गरी स्वागत गरेका थिए। टोलीको प्रतिनिधित्व वरिष्ठ पत्रकार डा. शशि भूषण कुमार र पुरातत्त्वविद् डा. अरुण कुमारले गरेका थिए।

बंगलादेश, नेपाल र भुटानलगायत विभिन्न देशका पत्रकारहरू सम्मिलित टोली अखिल भारतीय पत्रकार युनियन (AIJU) का राष्ट्रिय अध्यक्ष रञ्जित सम्राटको नेतृत्वमा लखीसराय पुगेको हो।

पत्रकार टोलीले जिल्लाको ऐतिहासिक तथा धार्मिक महत्व बोकेको इन्द्रधनेश्वर महादेव अशोकधाम मन्दिरको भ्रमण गर्दै त्यहाँ रहेका प्राचीन मूर्ति तथा ऐतिहासिक अवशेषबारे जानकारी लिएको थियो। पुरातत्त्वविद् डा. अरुण कुमार र उनको टोलीले स्थलको ऐतिहासिक तथा पुरातात्त्विक महत्वबारे पत्रकारहरूलाई जानकारी गराएका थिए।

त्यसपछि टोलीले लाली पहाडीमा भइरहेको पुरातात्त्विक उत्खननको समेत अवलोकन गरेको थियो। उत्खननका क्रममा फेला परेका महिला बौद्ध भिक्षुहरूको छात्रावासका अवशेषबारे टोलीले विशेष चासोका साथ जानकारी लिएको थियो।

पुरातत्त्वविद् डा. अरुण कुमारका अनुसार लाली पहाडीमा ठूलो संख्यामा महिला बौद्ध भिक्षुहरूको छात्रावासका अवशेष फेला परेका छन्। बिहारमा हालसम्म भएका पुरातात्त्विक खोजमध्ये यो महत्वपूर्ण तथा ठूलो संरचनामध्ये एक रहेको बताउँदै उनले भविष्यमा लाली पहाडी महत्वपूर्ण पर्यटकीय गन्तव्यका रूपमा विकास हुन सक्ने बताए।

प्रतिनिधिमण्डलमा बंगलादेशको ढाकाबाट आएका पत्रकार एमके सिद्दीकी, नेपाल वीरगञ्जका पत्रकार रुद्र सुविद, आलम अन्सारी, हाजीपुरका वरिष्ठ पत्रकार डा. शशि भूषण कुमारलगायत पत्रकारहरू सहभागी थिए।

यस अवसरमा लखीसरायका उपविकास आयुक्त (डीडीसी) सुमित कुमारले देश–विदेशबाट आएका तथा लखीसरायका AIJU पत्रकार प्रतिनिधिहरूलाई अंगवस्त्र प्रदान गरी सम्मान गरेका थिए।

डीडीसी सुमित कुमारले जमालपुरमा सम्पन्न अन्तर्राष्ट्रिय पत्रकार महासम्मेलनले विश्व शान्ति तथा लोकतन्त्रको संरक्षणमा सञ्चारमाध्यमको भूमिकाबारे महत्वपूर्ण सन्देश दिएको बताए। विश्वका विभिन्न क्षेत्रमा बढिरहेको तनाव र आपसी वैमनस्यका कारण युद्धको जोखिम बढिरहेका बेला देश–विदेशका पत्रकारहरूले अन्तर्राष्ट्रिय पत्रकार महासम्मेलनमार्फत विश्व शान्तिको सन्देश प्रवाह गर्नु सकारात्मक पहल भएको उनको भनाइ थियो।

कार्यक्रममा AIJU का राष्ट्रिय प्रधान महासचिव सुनील कुमार, जिल्ला प्रधान महासचिव अमलेश कुमार पाण्डेय, कोषाध्यक्ष जयप्रकाश, कार्यकारिणी सदस्य मनीष कुमार, हिमांशु कुमारलगायतको उपस्थिति थियो।