काठमाडौं, १८ असोज
नेपाल मगर संघले मगरात प्राप्तिका लागि भन्दै आन्दोलनका लागि युवा दस्ता तयार गर्न नेपाल मगर युवा संघलाई निर्देशन दिएको छ ।
मगर युवा संघको तेस्रो राष्ट्रिय महाधिवेशनबाट नवनिर्वाचित नेतृत्वलाई प्रमाणपत्र वितरण तथा दोस्रो पूर्ण बैठकको पूर्व सन्ध्यामा मगर संघले मगर युवा संघलाई जुझारु र सशक्त संगठन बनाउन निर्देशन दिएको हो । बुधबार सम्पन्न बैठकका अवसरमा निवर्तमान नेतृत्वलाई सम्मानसहित बिदाइ समेत गरिएको थियो ।
नेपाल मगर संघका महासचिव ज्ञानेन्द्र पुनमगरले विशेष निर्देशन दिँदै मगर समाजमा जाँडरक्सीलगायतका कुलत एवं विकृति, विसंगति नियन्त्रणका लागि मगर युवा संघले विशेष जागरण अभियान सञ्चालन गर्नुपर्ने आवश्यकता औंल्याउनुभयो । मगर युवालाई सकारात्मक मार्गमा डो¥याउन मगर युवा सचेतना अभियान सञ्चालन गर्नुपर्ने बताउँदै महासचिव पुनमगरले एक गाउँ, एक उद्यमशीलताको योजनाको खाका ल्याउन मगर युवा संघलाई निर्देशन दिनुभयो । साथै, उहाँले मातृ संगठनको नीति, निर्देशनलाई मानेर अघि बढ्न आग्रह गर्नुभयो ।
बैठकमा नेपाल मगर संघका केन्द्रीय संरक्षक अधिवक्ता गौबहादुर आलेमगर र नेपाल मगर संघका केन्द्रीय सदस्य एवं युवा फाँट प्रमुख अशोक सारूमगरले समेत मगर युवा संघले खेल्नुपर्ने भूमिकाका विषयमा विशेष निर्देशन दिनुभएको थियो ।
नेपाल मगर युवा संघका अध्यक्ष जयप्रकाश बुढामगरको अध्यक्षतामा भएको बैठकको सञ्चालन महासचिव एमानसिंह रानामगर र वरिष्ठ उपाध्यक्ष रेम पुनमगरले स्वागत गर्नुभएको थियो ।
