पोखरा, २० असोज
लखन बचत तथा ऋण सहकारी संस्था लिमिटेड, पोखरा–१०, रामघाट, कास्कीको १३ औं वार्षिक साधारणसभा तथा पाँचौं अधिवेशनबाट अध्यक्षमा पुनः पूर्णबहादुर रानामगर निर्वाचित हुनुभएको छ ।
शनिबार सम्पन्न अधिवेशनबाट उपाध्यक्षमा बुद्धिमाया थापामगर, सचिवमा डिलबहादुर श्रीसमगर, सह–सचिवमा गोविन्द थापामगर र कोषाध्यक्षमा झपटबहादुर रानामगर सर्वसम्मत निर्वाचित हुनुभएको हो । त्यसैगरी, ११ सदस्यीय सञ्चालक समितिका सदस्यहरूमा यामबहादुर थापामगर, चिजमाया थापामगर, जुनुकुमारी पुनमगर, पञ्चमाया थापामगर, धनकुमारी डिसुवामगर र लक्ष्मण पुनमगर निर्वाचित हुनुभएको छ । त्यस्तै, तिलबहादुर चितौरेमगरको संयोजकत्वमा तीन सदस्यीय लेखा समिति चयन भएको छ । लेखा समितिका सदस्यहरूमा भावना पुनमगर र टापबहादुर मास्कीमगर चयन हुनुभएको छ । ऋण उपसमिति र शिक्षा उपसमिति संयोजक एवं सदस्यहरू सञ्चालक समितिको बैठकले पछि मनोनित गरिने नवनिर्वाचित अध्यक्ष रानामगरले जानकारी दिनुभयो ।
यसअघि, अधिवेशनको उद्घाटन गर्दै भूमि व्यवस्था, कृषि, सहकारी तथा गरिबी निवारणमन्त्री चन्द्रबहादुर बुढामगर ‘सागर’ले कोरोनाको कारणले सुस्ताएको अर्थव्यवस्थालाई गति दिन सहकारीको विशेष योगदान रहने बताउनुभयो । उहाँले लखन सहकारीले गरिरहेको सिर्जनात्मक कार्यको प्रशंसा गर्दै यस्ता कार्यलाई निरन्तरता दिन आग्रह समेत गर्नुभयो ।
लखन सहकारीले मन्त्री सागरलगायत सहकारीका संस्थापक अध्यक्ष क्या. कृष्णबहादुर थापामगर, संस्थापक उपाध्यक्ष विष्णुमाया पुनमगर, कानूनी सल्लाहकार महेन्द्रमान श्रेष्ठ ‘व्यथित’ र असल ऋणी मनबहादुर थापामगरलाई दोसल्ला र सम्मानपत्रसहित सम्मान गरेको थियो । संस्थाका अध्यक्ष पूर्णबहादुर रानामगरको अध्यक्षतामा सञ्चालित कार्यक्रमको सञ्चालन सचिव डिलबहादुर श्रीसमगर र सह–सचिव गोविन्द थापामगरले गर्नुभएको थियो भने उपाध्यक्ष बुद्धिमाया थापामगरले स्वागत गर्नुभएको थियो ।