पातीचौर (पर्वत), २८ फागुन
समाजसेवी दुर्गा गुरुङ “मिलन”ले मिलन बहुउद्देश्यीय महिला कृषक समूह, मोदी गाउँपालिका वडा नं. ५, बाजुङ, पर्वतलाई वाद्यवादन सामग्री सहयोग गर्नुभएको छ । विभिन्न शुभ कार्यमा भजनकीर्तन तथा नाचगानका लागि आवश्यक पर्ने वाद्यवादन सामग्री समाजसेवी गुरुङले महिला समूहलाई सहयोग गर्नुभएको हो ।
सो महिला कृषक समूहले महाशिवरात्री पर्वका अवसरमा ॐकारेश्वर शिव मन्दिरमा आयोजित विशेष कार्यक्रममा वाद्यवादन सामग्री हस्तान्तरण गरिएको हो । मिलन ट्रष्टकी संरक्षक सावित्रीकुमारी गुरुङले महिला कृषक समूहकी अध्यक्ष विष्णुमाया अधिकारीलाई वाद्यवादन सामग्री हस्तान्तरण गर्नुभयो । त्यस्तै, समाजसेवी गुरुङले शिव मन्दिरका पुजारी वृद्धनाथ योगीलाई पुजारी पोशाक समेत हस्तान्तरण गर्नुभएको छ ।
समूहका सल्लाहकार अमर अधिकारीले सञ्चालन गर्नुभएको कार्यक्रममा शिव मन्दिरलाई समूहको तर्फबाट आर्थिक सहयोग समेत हस्तान्तरण गरिएको थियो । सो शिव मन्दिरको पुनर्निर्माणको परिकल्पना एवं अगुवाइ समाजसेवी दुर्गा गुरुङ “मिलन”ले गर्नुभएको थियो । हालै गठन भएको महिला कृषक समूहले दुई सातासम्म सरसफाइ अभियान समेत सञ्चालन गरेको थियो ।
