हिमाली वातावरणसम्बन्धी अन्तर्राष्ट्रिय सम्मेलन काठमाडौँमा हुँदै

118

कार्यक्रममा न्यूजिल्याण्डकी पूर्वप्रधानमन्त्री तथा संयुक्त राष्ट्रसङ्घीय विकास कार्यक्रमका पूर्वप्रमुख हेलेन क्लर्कले प्रमुख वक्ताका रूपमा सम्बोधन गर्नुहुनेछ भने विश्वविख्यात पर्वतारोही सर क्रिस बोनिनटन, रेनहोल्ड मेसनर र टेलिभिजन एडभेञ्चर बेन फोगलको पनि सम्बोधन रहने

काठमाडौँ, १६ फागुन – हिमालय क्षेत्रमा बढ्दै गएको फोहर, आरोहणमा पर्वतारोहीको बढ्दो चाप र अन्य कारणले यस क्षेत्रको वातावरणमा परेको प्रभावको दीर्घकालीन समाधानबारे बहसका लागि अन्तर्राष्ट्रियस्तरको सम्मेलन हुने भएको छ । आगामी जेठ १९ देखि २३ सम्म काठमाडौँमा सम्मेलन आयोजना हुनेछ । ‘सस्टेनेबल समिटस् कन्फरेन्स’ नाम दिइएको उक्त सम्मेलनमा नेपालको हिमालय क्षेत्रमा देखिएका समस्या, जनजीविकोपार्जन, हिमाली क्षेत्रको फोहर व्यवस्थापन, वातावरण परिवर्तनका असर र प्रभावलगायतका विषयमा वैज्ञानिक, अध्येता, विज्ञका कार्यपत्र प्रस्तुत गरी बहस हुने आयोजकले बताएका छन् ।

राजधानीमा आज पत्रकार सम्मेलन गरी आयोजक समितिका सदस्य लिसा चोग्यालले उक्त सम्मेलन हिमालय क्षेत्र ‘देवताहरूको बासस्थान’ हो भन्ने विश्वास र बुझाइलाई सम्मान तथा प्रवद्र्धन गर्दै यस भेकको वातावरणलाई विश्वका अन्य देशमा भएका राम्रा अभ्यासबाट पाठ सिकी हिमाली क्षेत्रको पर्यटन विकासमा सघाउने उद्देश्यले सम्मेलन गर्न लागिएको बताउनुभयो । सो कार्यक्रममा न्यूजिल्याण्डकी पूर्वप्रधानमन्त्री तथा संयुक्त राष्ट्रसङ्घीय विकास कार्यक्रमका पूर्वप्रमुख हेलेन क्लर्कले प्रमुख वक्ताका रूपमा सम्बोधन गर्नुहुनेछ भने विश्वविख्यात पर्वतारोही सर क्रिस बोनिनटन, रेनहोल्ड मेसनर र टेलिभिजन एडभेञ्चर बेन फोगलको पनि सम्बोधन रहनेछ ।


चार वटा मुख्य शीर्षकमा विभाजन गरिने सो कार्यक्रममा २०० भन्दा धेरै सहभागी विदेशी मुलुकबाट हुनेछन् । कार्यक्रमबाट नेपाललाई हिमालय क्षेत्रको वातावरणबारे विश्वमा विकास भएका राम्रा अभ्यासबाट पाठ सिक्ने र सोअनुरूप नीतिमा परिवर्तन ल्याउन सहयोग पुग्ने तथा नेपाल भ्रमण वर्ष २०२० लाई सघाउँदै नेपालको ७० वर्षको पर्वतीय पर्यटनको अनुभव पनि विश्वलाई सुनाउने अवसर प्राप्त हुनेछ । यो समिट नेपालको पर्यटन, संस्कृति तथा नागरिक उड्डयन मन्त्रालय, नेपाल पर्यटन बोर्ड र नेपाल भ्रमण वर्ष २०२० को संयुक्त आयोजनामा हुँदैछ । सहआयोजकमा इसिमोड, युएनडिपी, विश्व वन्यजन्तु कार्यक्रम, पेजल फाउन्डेसनलगायतका संस्था रहेका छन् । स्थानीय आयोजकका रूपमा क्लाइमेट एलाइन्स फर हिमालयन कम्युनिटी रहेको छ ।