लोकतान्त्रिक राष्ट्रिय मगर मोर्चा, गण्डकी प्रदेश कमिटीको सपथ ग्रहण

कम्युनिष्ट पार्टी निर्माणमा मगर समुदायको ठूलो योगदान छ ः नेता अधिकारी

220

पोखरा, २९ पुस
सत्तारुढ नेपाल कम्युनिष्ट पार्टी (नेकपा)निकट लोकतान्त्रिक राष्ट्रिय मगर मोर्चा, नेपाल, गण्डकी प्रदेश कमिटीको एकता प्रक्रिया टुंगिएसँगै सपथ ग्रहण सम्पन्न भएको छ ।


प्रदेश संयोजक लोकेन्द्र थापामगर र सह–संयोजक चिनीमाया कालामगरसहित ५५ सदस्यीय गण्डकी प्रदेश कमिटीका सदस्यहरूलाई मोर्चाका केन्द्रीय संयोजक भोजविक्रम बुढामगरले सपथ ग्रहण गराउनुभयो ।


सपथ ग्रहण तथा मोर्चाको गण्डकी प्रदेश कमिटीको प्रथम पूर्ण बैठकलाई सम्बोधन गर्दै नेपाल कम्युनिष्ट पार्टी (नेकपा)का गण्डकी प्रदेश सह–इञ्चार्ज खगराज अधिकारीले कम्युनिष्ट पार्टी निर्माणमा मगर समुदायको ठूलो योगदान रहेको बताउनुभयो । दशवर्षे जनयुद्ध, जनआन्दोलन, झापा विद्रोहमा पनि मगर समुदायले अग्रणी भूमिका खेलेको स्मरण गर्दै नेता अधिकारीले मगर समुदायबाट तनहुँका एकदेव आलेलगायतका नेताहरूले पार्टी निर्माणमा पनि उत्तिकै योगदान पु¥याएको बताउनुभयो ।


मोर्चाका केन्द्रीय संयोजक भोजविक्रम बुढामगरले मगर समुदाय र कम्युनिष्ट पार्टीबीच अन्योन्याश्रित सम्बन्ध रहेको जिकिर गर्नुभयो । जातीय मुक्तिका लागि लडेको कम्युनिष्ट पार्टीले समेत अझै पनि मगर समुदायको समानुपातिक प्रतिनिधित्व गराउन नसकेको भन्दै बुढामगरले नेपालको राजनीति र प्रशासनमा मगर समुदायको प्रतिनिधित्व हेर्दा चित्त बुझाउने ठाउँ नरहेको बताउनुभयो ।


मोर्चाका गण्डकी प्रदेश इञ्चार्ज लालबहादुर थापामगरले राजनीतिमा सक्रिय सहभागिता नभएसम्म जातीय मुक्ति कठिन हुने भन्दै मगर समुदायले राजनीतिमा विशेष चासो दिनुपर्ने बताउनुभयो । लोकतान्त्रिक राष्ट्रिय मगर मोर्चा, नेपाल, गण्डकी प्रदेश कमिटीका संयोजक लोकेन्द्र थापामगरको अध्यक्षतामा भएको कार्यक्रममा सह–इञ्चार्ज कृष्ण लामिछानेमगर र सह–संयोजक चिनीमाया कालामगरले पनि बोल्नुभएको थियो ।