पोखरा, २० कात्तिक
नेकपा (माओवादी केन्द्र), गण्डकी प्रदेश (तमुवान)ले पोखरा महानगरपालिकाले फुटपाथमा व्यापार गरी जीविकोपार्जन गर्ने साना व्यापारीलाई अनावश्यक दुःख दिएको भन्दै त्यसो नगर्न सचेत गराएको छ ।
माओवादी केन्द्रका प्रदेश सचिव भोजराज त्रिपाठीले बुधबार एक विज्ञप्ति जारी गर्दै फुटपाथ व्यापारीका सामानहरू खोस्ने, कुटपिट गर्ने तथा लखेट्नेजस्ता निन्दनीय कार्य महानगरपालिकाले गरेको बताउनुभएको छ । साना व्यापारीलाई अनावश्यक दुःख दिइ आतंकित पार्ने कार्य गरिएको भन्दै सचिव त्रिपाठीले व्यापारीबाट खोसिएका सामग्री फिर्ता गर्न र त्यस्ता कार्य अविलम्ब रोक्न आग्रह समेत गर्नुभएको छ ।
साना एवं खुद्रा व्यापारीलाई आतंकित पार्ने कार्य रोकी शान्तिपूर्ण वातावरणमा व्यवसाय गर्न पाउने अवस्था सिर्जना गर्न महानगरपालिकालाई विज्ञप्तिमार्फत् अनुरोध समेत गरिएको छ । महानगरपालिकाको दुःख दिने हर्कत जारी रहेमा आफ्नो पार्टीले आवश्यक निर्णय लिन बाध्य हुने पनि माओवादी केन्द्र, गण्डकी प्रदेशले विज्ञप्तिमार्फत् जनाएको छ ।