पोखरा, २६ भदौ
मगर भाषाका आदिकवि सु. रेखबहादुर सारूमगरको ७५ औं जन्मजयन्तीका अवसरमा प्रदान गरिने “मगर आदिकवि सु. रेखबहादुर सारूमगर साहित्य पुरस्कार”बाट यस वर्ष वेदान्त कविरत्न रूद्रबहादुर हितानमगरलाई सम्मान गरिने भएको छ ।
यही भदौ २८ गते मगर आदिकवि रेखबहादुरको जन्मजयन्तीका अवसरमा पोखरामा आयोजना हुने कार्यक्रममा वेदान्त कविरत्न रूद्रबहादुरलाई पुरस्कार प्रदान गर्न लागिएको हो । नेपाल मगर लेखक संघ, गण्डकी प्रदेश समितिले मगर आदिकवि रेखबहादुरका नाममा स्थापना गरेको सो पुरस्कारबाट यसअघि साहित्यकारद्वय फूलकुमारी थापामगर र लोकबहादुर थापामगर “झूस्या मगर” सम्मानित भइसक्नुभएको छ ।
संघका केन्द्रीय सचिव रूद्र “सन्देश” मगरको संयोजकत्वमा नेपाल मगर महिला संघकी केन्द्रीय सदस्य फूलकुमारी थापामगर र संघका केन्द्रीय सदस्य रूद्रबहादुर श्रीसमगर सदस्य रहेको प्रतिभा छनौट समितिले वेदान्त कविरत्नलाई पुरस्कृत गर्ने निर्णय गरेको हो । गण्डकी प्रदेशको राजधानी पोखरामा हुने कार्यक्रममा मगर लेखक, साहित्यकारहरूको उपस्थिति रहने संघका प्रदेश अध्यक्ष धीरेन्द्र थापामगर “किसानी”ले जानकारी दिनुभयो ।
तनहुँको रिसिङ गाउँपालिका–५, भीरकोट, अर्चल्डीमा वि.सं. २००१ मा जन्मिएका मगर आदिकवि रेखबहादुर पछि नवलपरासीको मोतीबस्ती, माकरमा बसाइँ सरेका थिए ।