पोखरा, २८ साउन
जापानका दुई विश्वविद्यालयको निमन्त्रणामा पृथ्वीनारायण क्याम्पसका क्याम्पस प्रमुख प्रा.डा. चन्द्रबहादुर थापाको नेतृत्वमा तिन सदस्यीय टोली साउन २८ गते औपचारिक भ्रमणका लागि जापानतर्फ प्रस्थान गरेको छ । भ्रमण टोली भदौ ५ गते स्वदेश फर्कने छ ।
भ्रमण टोलीले जापानका वाकानाई विश्वविद्यालय र मुरोरान ईन्स्टिच्युट अफ् टेक्नोलोजीमा संयुक्त गोष्ठीमा कार्यपत्र प्रस्तुतीकरण दिनुका साथै दुबै संस्थासंग द्विपक्षीय सम्झौता पत्रमा हस्ताक्षर गर्ने कार्यक्रम रहेको छ ।
वाकानाई विश्वविद्यालयका प्राध्यापक डा. विष्णुप्रसाद गौतम र मुरोरान ईन्स्टिच्युट अफ् टेक्नोलोजीका प्राध्यापक काजुहिको सातोले भ्रमणको पहल गरिदिनु भएको थियो । वहाँहरू दुबै आ–आफ्ना टोलीका साथ केहि महिनाअघिको नेपाल भ्रमणको बेलामा पृथ्वीनारायण क्याम्पससंगको सहकार्यात्मक कार्यक्रममा द्विपक्षीय सम्झौता पत्रमा हस्ताक्षर गर्ने कुरा तय भएको थियो ।
पृथ्वीनारायण क्याम्पसअन्तर्गत रहेको क्यू्एए÷रिफर्म युनिट र अन्तर्राष्ट्रिय सम्बन्ध एकाईका संयोजक सह–प्राध्यापक डा. मीन पुनका अनुसार, क्याम्पसले उच्च शिक्षालाई गुणस्तरीय बनाउन अन्तर्राष्ट्रिय सम्बन्धलाई पनि अगाडि बढाउनु पर्छ । वहाँले भन्नुभयो, “क्याम्पसले चीनको हेफी विश्वविद्यालयसँग प्राज्ञिक सहकार्यका लागि सम्झौता पत्रमा हस्ताक्षर गरिसकेको, जापानतर्फको भ्रमण टोलीले दुई जापानिज विश्वविद्यालयसंग सम्झौता गर्ने र निकट भविष्यमा भारतको महाराष्ट्र विश्वविद्यालयसंग सम्झौता गर्ने छ ।”
भ्रमण टोलीले जापानमा रहँदा पोखरा शहर र वाकानाई शहरबीचको मित्रताको सम्बन्ध कायम गराउनसमेत पहल गर्ने छ । यसका लागि टोलीले पोखरा लेखनाथ महानगरपालिकाको तर्फबाट वाकानाई शहरका लागि मित्रताको प्रस्तावसमेत लिएर गएको छ । टोलीले वाकानाई शहरका मेयरसंग भेटने कार्यक्रम पनि तय भएको छ ।
भ्रमण टोलीमा प्राणीशास्त्र विभागका उप–प्राध्यापक रामजी गौतम र वी.एससी. सीएसआईटी कार्यक्रमका फ्याकल्टी पृथ्वीराज पनेरु समावेश हुनुहुन्छ ।