पोखरा, २५ साउन
नेपाल केन्पो खुकुरी मार्शल आर्टस् संघ गण्डकी प्रदेश समितिले युवा तथा खेलकुद मन्त्री जगत विश्वकर्मालाई पोखरामा स्वागत गरेको छ ।
संघको गण्डकी प्रदेश समिति गठन भएपछि पहिलोपटक मन्त्री विश्वकर्मालाई स्वागत गरिएको हो । प्रदेश समितिका अध्यक्ष सुरेन्द्र गुरुङसहितको पदाधिकारी टोलीले मन्त्री विश्वकर्मालाई स्वागत गरेको हो ।
सो अवसरमा अध्यक्ष गुरुङसहित प्रदेश सांसद् एवं वरिष्ठ उपाध्यक्ष इन्द्रधारा विष्ट, उपाध्यक्ष दिलु गुरुङ, महासचिव रूद्रबहादुर श्रीस, कोषाध्यक्ष अधिवक्ता कुञ्जनी परियार ‘प्यासी’को समेत उपस्थिति रहेको थियो । संघको प्रदेश समितिका तर्फबाट अध्यक्ष गुरुङले केन्पो खुकुरी मार्शल आर्ट खेल र संघका बारेमा जानकारी गराउनुभएको थियो ।
क्यानाडाको प्रमुख खेलका रुपमा चिनिएको केन्पो खुकुरी नेपालमा नयाँ खेलका रुपमा भित्रिएको भन्दै अध्यक्ष गुरुङले यस खेलको विकास र विस्तारका लागि संघ क्रियाशील रहेको बताउनुभएको थियो । उहाँले राज्यका तर्फबाट पनि यस खेलको विकासका लागि आवश्यक सहयोगको अपेक्षा गरेको समेत उल्लेख गर्नुभयो ।
स्वागत एवं सम्मानका लागि धन्यवाद व्यक्त गर्दै मन्त्री विश्वकर्माले खेलकुदको विकासका लागि संघीय सरकार तत्पर रहेको बताउनुभयो । हरेक खेलको विकासका लागि सरकारले आवश्यक नीति एवं बजेटको व्यवस्था गरेको भन्दै मन्त्री विश्वकर्माले नेपाललाई विश्वमा चिनाउने राम्रो माध्यम खेलकुद नै भएको उल्लेख गर्नुभयो ।