हङकङ, २१ असार
मगर संघ हङकङको आयोजनामा भएको पाँचौं अरुण स्मृति साँझ–२०१८ मा नेपालबाट आएका उदीयमान कलाकारहरूले हङकङमा रहेका नेपालीहरूलाई आफ्ना आकर्षक प्रस्तुतीमार्फत् मनोरञ्जन दिएका छन् ।
जुन १६ मा युनलोङ थिएटर हलमा आयोजित कार्यक्रममा हङकङमा बस्ने नेपालीहरूले सांगीतिक मनोरञ्जन लिए । नेपालबाट आएका कलाकारहरूले आफ्नो गीत र नृत्यमार्फत् नेपालीहरूलाई आफ्नै जन्मभूमि नेपाल सम्झाइदिए ।
मगर संघ हङकङले विगत पाँच वर्षदेखि विश्व चर्चित गायक अरुण थापामगरको सम्झनामा हरेक वर्ष अरुण स्मृति साँझ आयोजना गर्दै आएको छ । जुन कार्यक्रममा नेपालबाट उदीयमान र अवसर पाउन नसकेका प्रतिभावान कलाकारहरू छनौट गरेर ल्याउने गरिएको छ । उदीयमान कलाकारलाई प्रोत्साहन गर्न कार्यक्रमलाई निरन्तरता दिइएको संघकी अध्यक्ष युगमाया रानामगरले जानकारी दिनुभयो ।
अरुण स्मृति साँझमा लोक तथा दोहोरी गायक नवीन रानामगर, अर्का लोक तथा दोहोरी गायक गंगा पुनमगर, नृत्य कलाकार शेखर घर्तीमगर, उमेश राई, गायिका तारा श्रीसमगर र कलाकार रविता मगरको आकर्षक प्रस्तुतीमा हङकङका नेपाली झुमेका थिए ।
कलाकारको प्रस्तुतीबाट कार्यक्रममा उपस्थित दर्शक पनि निकै खुशी भए । कार्यक्रममा मगर संस्कृति झल्किने कौरालगायतका विभिन्न नृत्य पनि प्रस्तुत गरिएका थिए । कार्यक्रममा उपस्थित दर्शकले उदीयमान कलाकारहरूको भविष्य निकै राम्रो रहेको प्रतिक्रिया पनि दिए ।
‘ऋतुहरूमा तिमी हरियाली वसन्त हौ’जस्ता कालजयी गीतका गायक अरुण थापामगरको स्मृति दिवस हरेक वर्ष साउन ५ गते मनाउने गरिन्छ । यस वर्ष गायक अरुणको २० औं स्मृति दिवस मनाउन लागिएको छ ।
यसैबीच, मगर संघ हङकङले नेपालबाट आएका कलाकारहरूलाई भव्य बिदाइ समेत गरेको छ ।
