रूद्र श्रीसमगर
पोखरा, २२ जेठ
तनहुँको व्यास नगरपालिका–१२, घाँसीकुवामा तीन दिने मगर भाषा, लिपि, साहित्य तथा संस्कृतिसम्बन्धी तालिमको मंगलबार समापन गरिएको छ ।
नेपाल आदिवासी जनजाति महासंघ वडा समन्वय परिषद्, व्यास नगरपालिका–१२, घाँसीकुवाको आयोजनामा आइतबारदेखि सुरु भएको तालिमको मंगलबार समापन गरिएको हो ।
तीन दिनसम्म चलेको तालिममा नेपाल मगर लेखक संघका केन्द्रीय सदस्य तथा मगर भाषा प्रतिष्ठान, कास्की शाखाका सचिव रूद्रबहादुर श्रीसमगरले मगर भाषा, लिपि तथा साहित्य र नेपाल आदिवासी जनजाति महासंघ, जिल्ला समन्वय परिषद्, तनहुँका सल्लाहकार यामबहादुर आलेमगरले मगर संस्कृतिसम्बन्धी सहजीकरण गर्नुभएको थियो ।
समापनका अवसरमा नेपाल मगर संघ, व्यास नगरपालिका–१२, घाँसीकुवाकी अध्यक्ष दानमाया थापामगरले तीन दिनको समय छोटो भएपनि तालिम निकै उपलब्धीपूर्ण बनेको बताउनुभयो ।
नेपाल आदिवासी जनजाति महासंघ, वडा समन्वय परिषद्, व्यास नगरपालिका–१२, घाँसीकुवाका अध्यक्ष नवीन थापामगरको अध्यक्षतामा भएको कार्यक्रमको सञ्चालन सह–सचिव वसन्ती थापामगरले गर्नुभएको थियो ।